Hugot nga gihimakak ni Department of the Interior and Local Government (DILG) Secretary Jonvic Remulla ang mga report nga nakadawat og espesyal nga pagtagad ang kontraktor nga si Curlee Discaya human siya gidakop may kalabotan sa mga kaso nga naglambigit sa giingong anomalous nga mga proyekto sa flood control.
Miingon si Remulla nga walay kamatuoran ang mga alegasyon nga gipanalipdan si Discaya tungod sa iyang giingong koneksyon sa mga gamhanang politiko.
Apan giklaro sa kalihim nga sama sa ubang mga dinakpan, ibutang si Discaya sa usa ka regular nga detention facility.
Gipasabot usab niya nga ang korte mao ang adunay katungod sa pagdesisyon kung asa ibutang ang usa ka akusado samtang nagpadayon ang pagdungog sa kaso.
Kahinumduman nga ang asawa ni Curlee nga si Sarah Discaya nadakpan na kaniadto ug karon anaa sa Lapu-Lapu City Jail sa Cebu.
Si Curlee Discaya, sa miaging mga imbestigasyon, gipahimutang usab sa kustodiya sa Senado sulod sa siyam ka bulan human gi-contempt niadtong Septyembre 2025 atol sa sunod-sunod nga hearing sa Senate Blue Ribbon Committee, sa wala pa siya gidakop pag-usab kalabot sa mga kasong giatubang niya karon.
