CEBU CITY- Gilunsad sa Cebu City Fire Station ang ‘Advanced Open Water and Rescue Divers Training’ alang sa 23 ka mga piniling kabomberohan aron mapalambo pa ang ilang kahanas ug kaalam sa paglangoy ug pagluwas og kinabuhi diha sa katubigan, karong adlawa, Hunyo 16, 2026.
Ang maong lakang mainitong gihangop ni FCSUPT Fred L. Trajeras Jr., ang Regional Director sa Bureau of Fire Protection (BFP) Region 7, inubanan sa pag-ampo nga mahimong hapsay ug malampuson ang tibuok dagan sa pagbansay.
Sumala ni Trajeras, dako kaayo kini ug tabang sa mga bombero aron makabaton og dugang kaalam ug preparasyon sa pagluwas sa katawhan, ilabi na kung moigo ang mga kalamidad ug katalagman.
Dugang pa sa opisyal, nanghinaot siya nga sa umaabot nga mga adlaw, aduna nay matukod nga ‘Water Rescue Man-made Facility’ dinhi mismo sa Probinsya sa Sugbo.
Kini aron mas mapalapad pa ang abilidad ug tabang nga ilang mahatag ngadto sa nagkalain-laing ahensya sa kagamhanan.
Gipanigkamotan usab karon sa pamunuan sa BFP nga mahatagan og dugang oportunidad ang mga kabomberohan nga mapadala alang sa usa ka advanced seminar didto sa nasod sa China.
Sa laing bahin, mipaambit usab sa iyang opening statement si PMsg. Esagani Cabanlit, ang Instructor sa maong training.
Matud niya, kining maong specialized course maoy maghatag ug lig-on nga kompiyansa ug kahibalo sa mga bombero sa saktong pagresponde ug pag-alagad sa komunidad.
Gipahimangnoan ni Cabanlit ang mga partisipante nga seryosohon ug itisok sa panunduman ang tulo (3) ka nag-unang misyon niining ilang pagbansay: Safety First, Skill Mastery, ug Efficient Community Response alang sa paghatag og dinalian, hapsay, ug dako nga tabang sa komunidad sa panahon nga aduna nay krisis sa katubigan.
Sa pagkakaron, pormal nang gisugdan ang mga exercises ug lecture samtang gihashasan ang pisikal ug mental nga kalig-on sa mga nahisgutang 23 ka mga partisipante.
