Gideklarang walay balor sa Court of Appeals (CA) ang kamanduan sa Office of the Ombudsman nga nagpakanaug og unom ka bulan nga preventive suspension batok kang Former Cebu Governor Gwendolyn Garcia.
Sa desisyon nga gisuwat ni Associate Justice Marietta Brawner-Cualing, giuyonan sa korte ang petisyon ni Garcia nga nagdeklara sa suspensyon niadtong Abril 23, 2025 nga invalid human masuta nga nakahimo og grave abuse of discretion ang Ombudsman ug nilapas kini sa mga lagda sa Omnibus Election Code ug Comelec Resolution No. 11059.
Nagsugod ang maong isyu gikan sa administratibong reklamo nga gisang-at ni Moises Garcia Deiparine, kinsa niangkon nga nag-abuso sa iyang gahom si Garcia sa dihang nagpagawas kini og special permit alang sa Shalom Construction Inc. aron mopahigayon og desilting activities sa Mananga River sa Talisay City ug Lusaran River sa Cebu City nga pulos sakop sa Central Cebu Protected Landscape.
Matod ni Deiparine, giluwatan ang permit nga walay Environmental Compliance Certificate (ECC) o Certificate of Non-Coverage (CNC) gikan sa DENR, hinungdan nga iyang gikasohan ang kanhi gobernador og gross misconduct, serious dishonesty, gross negligence, ug kalapasan sa Republic Act 6713.
Bisan pa man niini, gipatin-aw sa CA nga ang argumento sa mga respondents nga exempted ang preventive suspension ubos sa Section 261(x) sa Omnibus Election Code walay igong basehan sa kamatuoran ug balaod.
Ang maong hukom gipaboran usab nilang Associate Justices Gabriel Robeniol ug Maximo De Leon, kinsa mipaluyo sa baruganan nga dili mamahimong ipatuman ang suspension tungod sa nagpadayong ban sa eleksyon niadtong panahona.
