Patay nang naugkatan sa mga sakop sa Cebu City Disaster Risk Reduction and Management Office (CCDRRMO) inubanan sa mga kapulisan ug Brgy. Tanod sa Inayawan ang usa ka 39 anyos nga lalaki nga gituohang nalumos sa fish pond sa Sitio Lower Sto. Niño Brgy. Inayawan, Cebu City.
Ang maong lalaki giila sa mga tagtungod nga si Dickson Ocampo, 39 anyos, minyo, usa ka corn vendor, ug residente sa Inayawan.
Basi sa inisyal nga kasayuran, nakita nalang sa residente ang galutaw nga patayng lawas ni Ocampo sa usa ka fish pond sa naasoyng dapit, diin dali dayon kini nga girespondehan sa mga personahe sa CCDRRMO ug atol sa paghaw-as sa lawas, positibo kining giila sa iyang mga kabanay.
Matud pa sa iyang kabanay nga si Freda Amaba, atol sa eksklusibong pakighinabi sa Bombo Radyo Cebu, nasayran nga katapusang nakit-an si Ocampo nga maligo unta sa fish pond dayong kilumkilom, ug sukad ato wala na kini mahibalik.
Giingong nga wala pa miadto sa fishpond ang biktima adunay nahitabong panaglalalis tali sa biktima ug sa iyang asawa.
Sa pagkakaron, padayon pa ang imbestigasyon sa kapulisan sa Inayawan Police Station sa maong insidente, samtang gihan-ay na sa pamilya ni Ocampo ang haya ug pagpahiluna niini.
