Wala kapugngi sa aktres nga si Lotlot de Leon ang iyang emosyon samtang direkta niyang gitubag ang iyang igsoon nga si Ian de Leon bahin sa giingong bakak nga pamahayag niini kalabot sa mga kabtangan nga gibilin sa ilang inahan, ang mipanaw nga Superstar ug National Artist nga si Nora Aunor.
Atol sa story conference, hugot nga gihimakak ni Lotlot ang pasangil nga siya ug ang iyang mga igsoon nga sila si Matet, Kenneth, ug Kiko nag-apas sa kabilin sa beteranong aktres.
Gitataw niya nga mas mapasalamaton siya sa iyang inahan kaysa sa bisan unsang materyal nga butang.
Gihimo ni Lotlot ang pamahayag human sa interbyu ni Ian kang Boy Abunda.
Matod ni Ian, gipahibalo niya ang iyang mga igsoon sa plano nga magporma og one-person corporation (OPC) aron atimanon ang legasiya ni Nora, diin siya ang gitudlo nga mangulo isip legal nga manununod samtang wala gilakip ang iyang mga igsoon nga gisagop.
Gitino ni Lotlot, siya mismo ang niduol kang Ian sa ika-40 nga adlaw human sa pagkamatay sa ilang inahan aron hisgutan ang pagtukod og korporasyon.
Apan iyang gipasabot nga dili kini para sa personal nga kaayohan, kondili aron ipadayon ang adbokasiya ni Nora sa pagtabang sa mga nanginahanglan.
Taliwala sa iyang paghilak, nangayo una og pasaylo si Lotlot sa direktor sa pelikula nga si Louie Ignacio ug sa iyang mga kaubang aktres tungod kay nadala ang iyang personal nga isyu sa maong kalihokan.
