Nag-atubang og daghang federal charges sa Estados Unidos ang usa ka Filipina nurse practitioner human siya giakusahan nga maoy nagdumala sa usa ka dakong healthcare fraud scheme nga giingong nakapangilad sa Medicare ug TRICARE og hapit US$1 bilyon o gibana-banang ₱51.6 bilyon.
Ang suspek nga si Marizel Yukee, residente sa Las Vegas, gipasakaan og mga kaso nga naglakip sa conspiracy to commit healthcare fraud ug wire fraud, healthcare fraud, conspiracy to pay and receive illegal kickbacks, ug money laundering.
Sumala sa federal prosecutors, giingong target sa operasyon ang mga tigulang ug kritikal nga masakiton nga mga pasyente pinaagi sa paghatag og mga dili kinahanglanong pagtambal sa samad nga gi-bayaran dayon sa mga programa sa panglawas sa gobyerno.
Nalambigit si Yukee sa operasyon sa upat ka wound-care clinics sa Texas, Nevada, California, ug Hawaii, diin giingong nagbayad siya og ilegal nga kickbacks baylo sa mga referral sa pasyente.
Basi sa imbestigasyon, ang suspek giingong nagpeke usab sa mga medical record sa mga pasyente ug naningil alang sa dili kinahanglan nga mga serbisyo, samtang nakadawat og minilyon nga dolyar nga mga kickback.
Sumala pa sa mga piskal, giingong gigamit ang nakuhang kwarta sa pagpalit og mga luho ug mahalong kabtangan, lakip ang usa ka Ferrari supercar nga nagkantidad og kapin US$500,000, mga alahas sama sa Bulgari necklace nga nagkantidad og US$865,000, usa ka balay sa Hawaii nga gibanabana og US$1 milyon, ug usa ka beach resort project sa Santa Ana, Cagayan sa Pilipinas nga nagkantidad og US$4.6 milyon.
