Girekomenda sa Philippine National Police-Criminal Investigation and Detection Group (PNP-CIDG) ngadto sa Department of Justice (DOJ) ang pagpasaka og mga kaso tungod sa paglapas sa Anti-Hazing Act batok sa kanhi head coach sa Ateneo nga si Tab Baldwin ug 10 ka miyembro sa coaching ug support staff.
Kini may kalabotan sa kamatayon sa mga student-athlete nga sila si Rene Clert Baterbonia ug Divine Adili atol sa usa ka team-building activity sa Dipaculao, Aurora niadtong Hunyo 8.
Ang imbestigasyon sa PNP-CIDG nagbutyag nga ang gihimong seawater training mahimong isipon nga hazing tungod kay kini giingong hinungdan sa pisikal nga kasakit isip rekisito sa pagpabilin sa team, ug kabahin usab sa pagpili sa final lineup sa Ateneo alang sa sunod nga UAAP season.
Gikumpirma sa Department of the Interior and Local Government nga ang kalihokan gituyo aron hagiton ang pisikal ug mental nga kahimsog sa mga atleta.
Sumala sa mga imbestigador, lima sa mga magduduwa ang miingon nga dili sila makamao molangoy, apan nagpadayon sa water training atol sa high tide, diin duha ka biktima ang nalumos.
Padayon pa nga naninguha ang Bombo Radyo nga makuha ang habig sa kampo ni Tab Baldwin ug uban pang mga indibidwal kalabot sa maong mga akusasyon.
