Gikumpirma sa tigpamaba sa Iglesia ni Cristo (INC) nga si Bro. Edwil Zabala nga ang rally sa EDSA karung adlawa Martes, Hunyo 30, gihimo isip suporta kang Senador Rodante Marcoleta.
Nahitabo ang panagtapok human gipahibalo ni Ombudsman Boying Remulla ang pagsang-at og kasong plunder batok kang Marcoleta, nga usa ka non-bailable nga kaso, may kalabotan sa giingong P75 milyon nga campaign donations.
Sumala ni Zabala, wala mosupak ang INC sa pagpatuman sa balaod apan supak sila sa pagtuis niini, ilabi na kung gamiton aron pagtabon sa korapsyon.
Giinsistir usab nila nga ipadayon ang panawagan alang sa hustisya, transparency, ug accountability.
Samtang, gikumpirma ni MMDA General Manager Nicolas Torre III nga walay balido nga permit ang rally sa EDSA People Power Monument.
Matud niya, wala kini gi-coordinate, apan nagpadayon ang pagmonitor sa mga awtoridad aron masiguro ang seguridad ug kahusay.
Base sa banabana sa QCPD alas 9:00 sa buntag, mga 9,000 ka raliyista ang nagtigom sa EDSA ug White Plains Avenue. Aduna usab laing panagtapok sa Liwasang Bonifacio sa Manila diin mga 400 ka tawo ang gitaho nga mitambong.
Nagpadayon ang pagbantay sa mga awtoridad samtang gitahod ang katungod sa mga lungsoranon sa malinawon nga pagpahayag sa ilang baruganan.
