Ibutang sa full alert status ang tibuok National Capital Region (NCR) sugod karong Lunes, dungan sa pag-abli sa impeachment trial batok kang Bise Presidente Sara Duterte.
Gikumpirma ni National Capital Region Police Office (NCRPO) chief PMGen. Anthony Aberin nga gikan sa kasamtangang heightened alert, ipasaka ang lebel sa kaandam sa kapolisan human usab sa tulo ka adlaw nga gihimong protesta sa Iglesia ni Cristo (INC).
Sumala sa NCRPO, sa kinatibuk-an nagpabiling malinawon ang mga panagtapok sa INC, taliwala sa natalang gamay nga tensyon sa unang adlaw sa ilang rally didto sa EDSA People Power Monument.
Wala poy natalang seryosong insidente o aksidente sa dihang gibalhin ang maong protesta ngadto sa Liwasang Bonifacio sa Manila.
Samtang, gipahayag sa Philippine National Police (PNP) nga plantsado na ang tanang pagpangandam sa seguridad alang sa husay sa bise presidente.
Moabot sa 6,000 ka mga pulis ang ipakatap sa palibot sa Senado aron masiguro ang kahusay ug kalinaw sa maong adlaw.
Sumala sa pamahayag ni PNP Public Information Office chief PCol. Allen Rae Co, hugot nga gimandoan ni PNP Chief PGen. Jose Melencio Nartatez Jr. ang tanang personahe nga magpabiling disiplinado, walay gidapigan, ug nakatutok lang sa pagpangalagad sa publiko.
Gipasiugda ni Nartatez nga ang pagpasaka sa alert status kabahin lamang sa padayong pagtimbang-timbang sa kapolisan sa sitwasyon aron maseguro ang igong seguridad samtang ginahigpitan gihapon ang pagtahod sa tawhanong katungod sa mga lungsuranon.
