Usa ka dako nga pakigbisog para sa mga trabahante ang isyu sa pagtaas sa suweldo sa National Capital Region (NCR), sumala ni Akbayan Party-list Representative Percival Cendaña.
Gipasabot sa representante nga gikan sa orihinal nga P85 nga wage hike alang sa mga minimum wage earner, gihimo kini nga “installment” kun diin, P65 una karong tuiga ug P20 sa susunod nga tuig, hinungdan nga giisip niya kini nga ‘daw’ sinsiyo ra o gamay ra kaayo para sa mga sakripisyo nga gihimo sa mga trabahante.
Kini gipasamot matod pa niya sa Temporary Restraining Order (TRO) gikan sa Pasig Regional Trial Court (RTC) nga gi-isyu tungod sa petisyon sa pipila ka mga kompanya aron ipugos ang pagpatuman sa nahisgutang pagtaas sa sweldo. Subay niini, si Cendaña nagpasidaan nga kini nga epekto dili limitado sa Metro Manila tungod kay kung kini mahimong ehemplo o “precedent”, posible usab nga babagan sa mga kompanya sa ubang mga rehiyon sama sa Cebu ug Central Visayas ang giaprobahan nga pagtaas sa sweldo sa ilang Regional Wage Board.
Tungod niini, nanawagan si Cendaña sa gobyerno, ilabi na sa Department of Labor and Employment (DOLE), nga barugan ang katungod sa mga mamumuo. Ang desisyon sa RTC gihatagan og rason nga kini “may depekto” tungod kay sumala sa Labor Code, ang bisan unsang protesta o petisyon batok sa wage order kinahanglan nga ipasaka sa Regional Wage Board ug dili sa korte.
Dugang pa niana, gihagit usab sa Akbayan Party-list ang administrasyong Marcos nga aron pamatud-an ang ilang pasalig sa pagtabang sa mga trabahante pinaagi sa pagsertipika sa pagkadinalian sa balaodnon alang sa probisyon sa pagpataas sa sweldo.
