Gilauman sa National Capital Region Police Office (NCRPO) ang mas daghang partisipante sa ikaduhang adlaw sa rally sa Iglesia ni Cristo (INC) karong Miyerkules, Hulyo 1, 2026, human opisyal nga gihatagan og permit ang maong kalihokan sa lokal nga kagamhanan sa Quezon City.
Matod ni NCRPO Spokesperson Maj. Hazel Asilo, posible nga susama o molapas pa sa unang adlaw ang gidaghanon sa mga motambong tungod kay adunay na’y pormal nga pagtugot alang sa rally.
Sumala sa inisyal nga datos sa Quezon City Police District (QCPD), gibana-bana nga 5,000 ka tawo ang sayong nagpundok sa EDSA People Power Monument sugod alas-6 sa buntag.
Kahinumduman nga sa unang adlaw sa rally niadtong Martes, nakarekord ang mga awtoridad og halos 15,500 ka partisipante.
Gi-aprobahan sa Quezon City Department of Public Order and Safety ang hangyo sa INC alang sa malinawong panagtigom subay sa White Plains Avenue paingon sa Temple Drive, sugod alas-8 sa buntag hangtod alas-8 sa gabii.
Gipahayag ni Asilo nga nakapangandam dayon ang NCRPO alang sa seguridad ug pagdumala sa trapiko human ma-isyu ang permit.
Nakig-coordinate usab ang NCRPO sa Metropolitan Manila Development Authority aron masiguro ang hapsay nga dagan sa trapiko ug pagdumala sa mga apektadong bahin sa EDSA.
Mga 3,000 ka personahe sa kapulisan ang gipakatap sa lugar aron mapadayon ang kalinaw ug kaluwasan sa publiko sulod sa tibuok gidugayon sa kalihokan.
Nagpadayon ang monitoring sa mga awtoridad ug lokal nga opisyal samtang gihimo ang mga lakang aron maminusan ang epekto sa trapiko ug uban pang kahasol sa mga kasikbit nga lugar.
