Nakatala ang Philippine Institute of Volcanology and Seismology (Phivolcs) og managlahing kalihokan sa Taal ug Kanlaon Volcanoes sayo karong adlawa.
Sa Taal Volcano, nahitabo ang gagmay nga phreatomagmatic eruptions sa Main Crater gikan alas 7:13 hangtod alas 7:17 sa buntag.
Ang pagbuto nakamugna og plume nga misaka hangtod 450 metros ang gitas-on, base sa mga imahe gikan sa Main Crater Observation Station pinaagi sa IP ug thermal cameras.
Bisan pa niini, nagpabilin ang Taal Volcano sa Alert Level 1.
Samtang, sa Kanlaon Volcano, naobserbahan ang hinay apan klaro nga crater glow sa kinatumyan gikan alas 3:40 hangtod alas 4:30 sa buntag.
Sumala sa resident volcanologist sa Phivolcs nga si Mari-Andylene Quintia, ang pagsidlak mahimong timailhan nga ang magma misaka sa mabaw nga bahin sa bulkan.
Matud niya, posible kini nga pasiuna sa usa ka magmatic o explosive eruption, apan sayo pa aron makumpirma.
Dugang ni Quintia nga ipadayon sa Phivolcs ang pagmonitor sa Kanlaon crater. Kung magpadayon o mokusog ang crater glow, posible nga ipataas ang kasamtangang Alert Level 2.
Gitala usab sa Phivolcs nga niadtong Mayo, adunay susamang pagsidlak sa Kanlaon nga milungtad og duha ngadto sa tulo ka adlaw sa wala pa kini nawala.
