Gipangita karon sa kapulisan ang usa ka misteryosong lalaki nga gitawag sa mga netizen og “Mexican Batman” human sa sunod-sunod nga insidente sa pagdakop ug pag-gapos sa mga gidudahang kawatan sa motorsiklo sa Lagos de Moreno, Mexico.
Sulod lamang sa napulo ka adlaw, mokabat sa lima ka mga gidudahang kawatan ang gikatahong nadakpan niini ug gigapos gamit ang duct tape sa mga poste sa karsada.
Ang uban kanila nakit-an tupad sa gikatahong gikawat nga motorsiklo ug adunay pulong nga “ratero,” usa ka Spanish nga pulong nga nagpasabot og “kawatan,” nga gisulat sa ilang agtang.
Daghang residente ang mipakita og suporta sa social media, nga nag-ingon nga gibuhat lamang sa maong vigilante ang wala mahimo sa kapulisan batok sa kriminalidad.
Apan alang sa mga awtoridad, dili mahimong ilisan sa kaugalingong pagpatuman sa silot ang balaod. Ingon man bisan pa og adunay suporta gikan sa publiko, ang vigilante justice nagpabiling supak sa balaod ug mahimo pang kasuhan.
Sa pagkakaron, nagpadayon ang imbestigasyon sa mga awtoridad aron mailhan ug madakpan ang misteryosong lalaki nga gitawag sa katawhan og “Mexican Batman.”
