Mibayad og $160,000 o kapin sa ₱9.3 milyon si Taylor Swift alang sa permit sa New York City aron ipahigayon ang iyang bonggang kasal uban sa NFL star nga si Travis Kelce sa Madison Square Garden karong bulana, sumala ni New York City Mayor Zohran Mamdani niadtong Biyernes.
Sa iyang pamahayag sa mga tigbalita, giingon ni Mamdani nga si Swift mismo ang mibayad sa bayranan alang sa permit ug sa mga kahikayan sa seguridad sa maong kalihokan.
Ang pahayag gihimo human siya gipangutana kon gibayran ba sa mang-aawit ang gasto sa overtime sa mga pulis nga gibutang aron magbantay sa seremonya.
Matod ni Mamdani, mokabat sa kapin sa $160,000 ang kantidad sa permit nga gi-isyu alang sa maong kalihokan, lakip na ang mga kinahanglanong lakang sa seguridad.
Ang kasal, nga gihimo sulod sa duha ka adlaw sa Manhattan, gitambongan sa gatosan ka mga iladong personalidad ug nanginahanglan og dakong deployment sa kapulisan, lakip ang temporaryong pagsira sa pipila ka mga kalsada sa palibot sa Madison Square Garden.
Wala pa gipahibalo ang kinatibuk-ang gasto sa maong kasal, apan base sa banabana sa Forbes, gituohang milapas kini sa $20 milyon.
Gawas pa niini, ang magtiayon mihatag usab og $26 milyon nga donasyon ngadto sa nagkalain-laing charitable organizations sa wala pa ang ilang kasal.
