CENTRAL VISAYAS- Na-stranded ang daghang mga pasahero sa nagkalain-laing pantalan sa Cebu ug Bohol human gikanselar ang daghang biyahe sa dagat gahapon Biyernes, Hulyo 10, 2026.
Gipahinabo ang pagsuspinde sa mga biyahe tungod sa peligrosong kahimtang sa kadagatan dala sa hanging Habagat nga gipakusog sa Bagyong Inday.
Gikumpirma sa Philippine Coast Guard–Central Visayas (PCG-7) nga sugod alas 12:00 sa udto gahapon Biyernes, mokabat sa labing menos 94 ka pasahero ang na-stranded human mapahunong ang ilang mga biyahe.
Sa tala sa PCG-7, unom ka biyahe ang gikanselar sa Cebu City, duha ka biyahe matag usa sa mga pantalan sa Toledo City, Lapu-Lapu City, ug Olango Island, samtang adunay usa ka biyahe nga nasuspinde sa Danao City ug lungsod sa Cordova.
Sa amihanang bahin sa Cebu, gikanselar usab ang pipila ka biyahe sa Bogo City, Daanbantayan, ug Camotes Island human ipatuman ang temporaryong pagdili sa paglawig sa mga barko nga adunay 35 gross tons (GT) paubos.
Gidili usab ang paglawig sa mga sakayan nga adunay tulo ka GT paubos sa Madridejos ug Tabogon, 15 GT paubos sa Asturias, samtang hingpit nga gipahunong ang operasyon sa tanang motorbanca sa isla sa Malapascua.
Base sa datos sa PCG-7, mokabat sa 18 ka barko ug 17 ka motorbanca ang temporaryong mipasilong sa mga pantalan tungod sa daotang kahimtang sa panahon.
Dugang pa niini, 97 ka rolling cargo o mga sakyanan nga adunay kargamento ang naapektuhan usab ug na-stranded.
