Gikondena sa Department of National Defense (DND) ang AI-generated nga bidyo nga gipagawas sa Chinese state media outlet nga China Daily nga naghulagway sa mga Pilipino isip mga unggoy.
Gihulagway kini sa DND isip usa ka racist nga propaganda ug insulto batok sa katawhang Pilipino.
Matud ni Defense Secretary Gilberto Teodoro Jr., ang maong AI-generated nga post nagpakita sa giingong pagtan-aw sa Chinese Communist Party (CCP) ngadto sa mga Pilipino.
Ang kontrobersyal nga AI-generated nga bidyo gipatik sa Hulyo 10, 2026, duha ka adlaw sa wala pa ang ika-10 anibersaryo sa desisyon sa Permanent Court of Arbitration nga miila sa katungod sa Pilipinas sulod sa iyang Exclusive Economic Zone (EEZ) sa West Philippine Sea.
Sa pahayag nga gipagawas niadtong gabii sa Hulyo 16, giingon ni Teodoro nga ang paghulagway sa mga Pilipino isip mga unggoy pinaagi sa AI-generated nga bidyo usa ka porma sa pagpakaulaw ug propaganda batok sa nasud.
Makita sa AI-generated nga bidyo ang usa ka unggoy nga nagsul-ob og barong Tagalog ug salakot samtang daw gisugo sa mga karakter nga nagrepresentar sa mga Amerikano ug mga Hapones.
Gipakita usab sa bidyo ang maong unggoy nga giigo og water cannon sa dagat human makadawat og kopya sa 2016 Arbitral Award.
Sumala ni Teodoro, ang maong AI-generated nga materyal usa ka pagbiaybiay sa 2016 Arbitral Award ug nagpakita sa giingong pag-awhag sa kapintasan batok sa mga Pilipino ug sa mga sundalo.
Gitawag usab sa kalihim nga “contemptible propaganda” ang maong post ug gipasiugda nga kini nagpakita sa kakulang sa China og makatarunganong depensa sa ilang posisyon bahin sa West Philippine Sea.
Samtang, nagpagawas usab og pahayag si Rear Admiral Jay Tarriela, tigpamaba sa Philippine Coast Guard alang sa West Philippine Sea concerns, diin iyang gikondena ang tanang porma sa rasismo.
Matud ni Tarriela, walay lugar ang racism sa karong panahon ug ang pagpakaubos sa laing kaliwat angay nga hukman ug kondenahon.
Iyang gipasiugda nga ang mga Pilipino dili mga unggoy ug ang maong AI-generated nga propaganda dili angayng pasagdan.
