CENTRAL VISAYAS- Nagpabilin nga labing maayo nga Police Regional Office sa tibuok nasod ang Police Regional Office 7 (PRO-7) human niini nakuha ang labing taas nga Unit Performance Evaluation Rating (UPER) sulod sa 14 ka sunod-sunod nga bulan.
Base sa gipagawas nga UPER alang sa Mayo 2026, nakatala ang PRO-7 og kinatibuk-ang iskor nga 86.04.
Kini ang labing taas nga marka sa tanang rehiyonal nga buhatan sa Philippine National Police (PNP) sa nasod, diin nakakuha kini og adjectival rating nga “Very Satisfactory.”
Ang UPER mao ang opisyal nga si sa PNP nga mosukod sa katakus ug abilidad sa matag police unit pinaagi sa pagtimbang sa ilang operational accomplishments, administrative efficiency, resource management, ug pagsunod sa mga organisasyonal nga sumbanan.
Matod sa PRO-7, ang maong kalamposan nagpamatuod sa epektibong liderato, episyenteng operasyon, ug lig-on nga internal governance sa rehiyon sa Central Visayas.
Gidayeg ni Police Brigadier General Arnold E. Abad, Regional Director sa PRO-7, ang tanang opisyal, personnel, ug non-uniformed personnel sa rehiyon tungod sa ilang gipakita nga dedikasyon ug propesyonalismo.
Hinuon, gipahinumdoman ni Abad ang iyang mga sakop nga ang maong pag-ila dili angayng ikakampante, kondili usa kini ka hagit aron padayon nga mapalambo ang ilang performance ug mapatigbabaw ang labing taas nga sukdanan sa integridad, accountability, ug operational excellence.
