Gialmahan ni Cebu City Councilor Sisinio Andales ang legalidad sa bag-ong house rules, nga giingung nagpakunhod sa gahum sa Bise Mayor, Tomas Osmena.
Hinungdan nga nangayo og katin-awan ang Cebu City Council ngadto sa Department of the Interior and Local Government o DILG aron ipasusi ang legalidad niini.
Kahinumduman sa iyang privilege speech, giingon ni Minority Floor Leader Councilor Sisinio Bebs Andales nga wala mosunod sa due process ang mayoriya sa pag-aprobar sa mga kausaban tungod kay wala hatagi og igong panahon ang minoriya sa pagrepaso niini.
Lakip sa gikwestyon ang pagbalhin sa awtoridad sa pag-aprobar sa mga ordinansa ug resolusyon nga isalmot sa legislative agenda gikan sa bise mayor ngadto sa Majority Floor Leader.
Gikuhaan usab og katungod ang presiding officer nga temporaryong mobiya sa iyang lingkoranan aron makasalmot sa deliberasyon.
Apan, matod ni House Rules Committee Chairman Councilor Philip Zafra, ang mga kausaban nahiuyon lamang sa DILG Opinion No. 95, Series of 2025, nga naglatid nga ang bise mayor adunay tahas sa pagdumala sa sesyon ug pagbotar lamang kung adunay tie vote.
Bisan pa man sa reklamo sa minoriya, nagpabiling epektibo ang bag-ong House Rules. Samtang, giaprobahan sa konseho ang pagpadala sa privilege speech ni Andales ngadto sa DILG Region 7 aron makabaton og opisyal nga legal nga opinyon sa maong isyu.
