CEBU CITY- Mahimong ma-exempt sa Bank Secrecy Law ang mga kaso sa impeachment, sumala kang ICC-accredited lawyer Atty. Rameses Victorious Villagonzalo, human giaprobahan sa Senate Impeachment Court ang mosyon sa prosekusyon nga ipa-subpoena ang bank, tax, ug Anti-Money Laundering Council (AMLC) records ni Bise Presidente Sara Duterte.
Sa eksklusibong pakighinabi sa Bombo Radyo Cebu, giklaro ni Villagonzalo nga bisan og kasagarang gipanalipdan sa Bank Secrecy Law ang mga deposito sa bangko, adunay mga eksempsiyon nga gitugotan sa balaod ug sa jurisprudence.
Ang maong isyu mitumaw human giaprobahan ni Senate Impeachment Court Presiding Judge Francis “Chiz” Escudero ang mosyon sa prosekusyon aron ipa-subpoena ang bank records, tax records, ug AMLC records ni Duterte nga naglangkob sa panahon gikan sa 2007 hangtod 2021.
Matod kang Escudero, ang gipangayong mga dokumento nakatuman sa mga rekisitos sa korte ug adunay prima facie relevance sa mga alegasyon sa giingong unexplained wealth nga gilakip sa Article II sa Articles of Impeachment.
Gipasabot ni Villagonzalo nga ang Bank Secrecy Law dili absoluto. Matod niya, gawas sa impeachment proceedings, mahimo usab nga ma-access ang bank records sa pipila ka espesyal nga kahimtang nga gitugotan sa balaod ug sa mga desisyon sa korte, lakip na ang mga kaso nga may kalabotan sa bribery, ingon man sa pipila ka jurisprudence nga naghisgot sa rebellion ug coup d’état financing.
Busa, tungod kay impeachment proceeding ang giatubang sa Bise Presidente, giingon sa abogado nga mahimong ma-apply ang maong eksempsiyon, nga posibleng magtugot sa korte sa pagtan-aw sa mga rekord nga gihangyo pinaagi sa subpoena.
