Gitun-an sa Philippine National Police (PNP) ang usa ka sugyot aron limitahan ang paggamit sa social media sa mga kabatan-onan.
Ang maong sugyot nitumaw atol sa ika-44 nga ASEANAPOL Conference diin ang mga lider sa pulisya nagbayloay og mga panan-aw bahin sa nagkadako nga mga hulga sa seguridad nga naglambigit sa mga kabatan-onan ug cyberspace.
Si PNP chief Police General Jose Melencio Nartatez Jr. miingon nga gusto nilang sundogon ang gipatuman sa Australia.
Lakip sa mga gihisgutan sa maong conference mao ang pagpamusil sa eskwelahan sa Tacloban City nga naglambigit sa mga kabatan-onan.
Dugang ni Nartatez nga human sa mga meeting sa mga silingang nasud ug daghang mga diskusyon, adunay mga balaod nga mahimong ikonsiderar alang sa implementasyon sa nasud.
