Gipanalipdan ni Presidente Ferdinand Marcos Jr. ang kapakanan sa mga Pilipino nga naapektuhan sa kagubot sa Middle East pinaagi sa pagdeklara dayon sa State of National Energy Emergency aron matubag ang epekto sa krisis sa nasud, sumala sa iyang State of the Nation Address (SONA).
Matud sa Presidente, gimandoan ang tanang ahensya sa gobyerno nga magtinipid ug ipunting ang pondo sa mga programa nga mas makatabang sa katawhan. Giingon usab niya nga ang pondo nga naluwas gikan sa mga tiwaling opisyal gigamit alang sa mga batakang serbisyo nga direktang mapuslan sa mga Pilipino.
Gipahibalo usab ni Marcos nga gipagawas ang dugang nga hapit ₱58 bilyon ngadto sa mga lokal nga pangagamhanan aron mapaspasan ug mapalapdan ang paghatag og serbisyo sa ilang mga komunidad. Sumala niya, nagpakita kini sa pagsalig sa administrasyon sa kapasidad sa mga LGU sa pag-atiman sa ilang mga nasasakupan.
Gisugdan usab sa gobyerno ang pagtabang sa mga Overseas Filipino Workers (OFWs) nga naipit sa kagubot sa Middle East. Sukad sa pagsugod sa gubat, kapin sa 12,000 ka mga Pilipino ang luwas nga napauli sa nasud, samtang kapin sa 140,000 ka OFWs ang nakadawat og nagkalain-laing ayuda sama sa pagkaon, pinansyal nga tabang, medikal nga serbisyo ug temporaryong kapuy-an.
Samtang sa ilang pagbalik sa Pilipinas, gitabangan sila sa gobyerno pinaagi sa AKSYON Fund ug OWWA-Kabuhayan Program aron makasugod pag-usab sa panginabuhi. Ang uban gipasulod sa mga oportunidad sa trabaho pinaagi sa Public Employment Service Office (PESO) ug Bayanihan para sa Balikbayang Manggagawa Job Fairs, samtang ang uban gitabangan usab nga makabalik sa trabaho sa laing nasud.
Gipasiugda usab ni Presidente Marcos nga padayon ang koordinasyon sa gobyerno sa ubang mga nasud aron maseguro ang kaluwasan sa mga OFW, ilabi na sa mga lugar nga naapektuhan sa kagubot sa Middle East.
