Nangayo og tabang ang mga awtoridad sa Ceuta sa gobyerno sa Espanya human sa pagdagsa sa liboan ka mga migrante ngadto sa maong gamay nga teritoryo sa Espanya sa amihanang Africa.
Gihangyo sa mga opisyal ang Madrid nga magdeklara og nasudnong emerhensya ug magpadala og dugang nga pwersa sa seguridad aron mapalig-on ang pagbantay sa utlanan.
Nagpakita ang mga video gikan sa Tarajal Beach sa gatusan ka mga migrante, kadaghanan mga Moroccan, nga mitabok pinaagi sa breakwater ug misulod sa baybayon ug mga dalan padulong sa teritoryo sa Espanya.
Lakip sa mga misulay pagsulod ang mga batan-on, babaye, ug mga bata nga uban sa ilang pamilya.
Matod ni Ceuta regional president Juan Jesús Vivas, gikinahanglan ang dugang nga pwersa sa pulisya ug militar aron mapadayon ang kahapsay ug seguridad.
Gipahayag usab ni Vivas nga puno na ang mga sentro sa pagdawat sa mga migrante sa Ceuta, hinungdan nga ang uban napugos sa pagpabilin sa kadalanan.
Misamot ang tensyon sa utlanan tali sa Espanya ug Morocco tungod sa padayon nga pagsulay sa mga migrante nga makasulod sa Ceuta, lakip ang mga naningkamot nga molangoy aron makaabot sa teritoryo sa Espanya.
Niadtong 2021, kapin sa 8,000 ka migrante ang nakasulod sa Ceuta sulod lang sa duha ka adlaw, usa sa pinakadakong krisis sa utlanan tali sa Espanya ug Morocco.
