Nangatarungan ang usa ka state auditor nga adunay mga iregularidad sa paggamit sa P375 milyon nga confidential funds sa Office of the Vice President (OVP) niadtong 2023.
Atol sa ika-15 nga adlaw sa impeachment trial ni Bise Presidente Sara Duterte niadtong Miyerkules, niingon si Commission on Audit (COA) Intelligence and Confidential Funds Audit Office auditor Xylene del Campo nga ang mga dokumento nga gisumite sa OVP dili igo aron pamatud-an ang paggasto sa confidential funds.
Apil niini ang pagbayad sa mga reward, nga sumala ni Del Campo, walay igo nga dokumento nga nagpamatuod sa mga resulta sa pagkolekta og impormasyon o surveillance nga mao ang basehan sa pagbayad. Ingun man matod pa, wala usab gihatag ang dugang nga mga dokumento aron mailhan ug mapamatud-an ang pipila ka gipalit nga mga suplay, medical ug food aid.
Nakakita usab ang COA og mga iregularidad sa reimbursement sa mga gasto, lakip ang mga surveillance expenses.
Sumala ni Del Campo, ang confidential funds dili magamit alang sa pagbayad tungod kay kini nakalapas sa Joint Circular No. 2015-01, nga naglatid sa mga giya alang sa paggamit sa confidential ug intelligence funds. Gidugang niya nga ang mandato sa OVP ug sa Department of Education (DepEd) wala maglakip sa pagpahigayon sa mga confidential operations.
Samtang, si Del Campo wala makahatag og tino nga tubag kung ang mga ngalan sa pipila ka mga nakadawat sa confidential funds, nga gihulagway sa depensa nga daw “funny names,” tinuod ba o hinimo-himo.
Sa dihang gipangutana sa abogado sa depensa nga si Atty. Kristine Ferrer kung ang mga ngalan dili peke, si Del Campo miingon nga dili niya kini matubag.
Gikuwestiyon usab sa depensa ang pagsumite sa COA sa mga dokumento sa audit bahin sa confidential funds ngadto sa House panel nga nagpahigayon og imbestigasyon sa paggamit sa OVP ug DepEd funds. Diin gipasabot ni Del Campo nga ang COA nagsumite sa mga dokumento subay sa mando sa House panel.
Samtang, ang House prosecution team miingon nga naglaum sila nga ang Senate impeachment court magpadayon nga mahimong malumo sa mga pahayag sa mga partido samtang nagpadayon ang husay.
Sa sayo pa, ang Senate impeachment court Presiding Officer Francis “Chiz” Escudero nagpasidaan batok sa paglapas sa sub judice rule o paghisgot sa merito sa kaso samtang nagpadayon ang husay.
Gipahimangnoan usab ni Escudero ang mga abogado sa depensa ug prosekusyon nga pahuwayon ang tensyon sa husay human si Ferrer ug ang pribadong piskal nga si Lorna Kapunan naglalis bahin sa paggamit og mga pangutana nga makapahisalaag sa cross-examination.
Sa ulahing bahin sa sesyon, gipahibalo ni Escudero ang bag-ong mga subpoena alang sa duha ka kanhing special disbursing officer nga nagserbisyo sa mga ahensya nga gipangulohan ni VP Sara. Apil niini sila si Gina Acosta, kanhing SDO sa OVP, ug Edward Fajarda, kinsa SDO sa DepEd sa dihang si Duterte ang kalihim niini. Subay niini, gimandoan sila nga motestigo sa impeachment trial tali sa Agosto 17 ug 19.
