Gisuspinso sa Land Transportation Office sa Central Visayas (LTO-7) sulod sa 90 ka adlaw ang drivers license sa usa ka drayber sa public utility jeepney (PUJ) nga giingong nalambigit sa usa ka reckless driving incident nga nakaangol og lima ka tawo ug nakadaot og unom ka sakyanan sa Colon Street niadtong Agosto 11.
Gi-isyu sa LTO-7 ang preventive suspension human gi-forward sa Cebu City Police Office (CCPO) Traffic Enforcement Unit (TEU) ang lisensya sa pagmaneho ngadto sa ahensya human sa aksidente duol sa intersection sa Colon ug Junquera street.
Sumala sa LTO-7, ang drayber giingong mipaspas ug nabangga sa mga motorsiklo nga nagbiyahe sa samang direksyon, hinungdan nakamugna kini ug angol ug kadaot sa mga sakyanan.
Gipaubos usab sa buhatan sa alarma ang PUJ ug gimandoan ang drayber nga i-surrender ang iyang lisensya ug mosumiter og beripikadong pagpasabot sulod sa lima ka adlaw.
Kahinumdoman nga nahitabo ang aksidente sa hapon sa Agosto 11 duol sa usa ka dakong mall sa Colon nga gikalambigitan sa PUJ, lima ka motorsiklo ug usa ka sedan
Ang aksyon sa LTO-7 nahitabo human sa hangyo sa CCPO traffic unit alang sa administratibong silot batok sa drayber ug sa sakyanan.
