Mopresentar ang House prosecution team sa mga opisyal sa Philippine Statistics Authority (PSA) sa impeachment trial batok kang Bise Presidente Sara Duterte, sumala ni House Prosecutor Terry Ridon.
Kini aron pamatud-an ang mga pasangil nga ang mga indibidwal nga gihatagan og confidential funds sa Office of the Vice President (OVP) kay “fictitious” o hinimo-himo lang.
Sumala sa magbabalaod, ang mga opisyal sa PSA gilakip isip mga saksi sa pasangil sa sayop nga paggamit sa confidential funds tungod kay sila ang nagpahigayon sa pagtuon ug nagbutyag niini sa House inquiry.
Matod niya nga ang pagtuon nagbutyag nga ang mga ngalan sa acknowledgement receipts sama nila ni Mary Grace Piattos, Milky Secuya, ug uban pa wala matawo, ug wala mamatay sa Pilipinas tungod kay wala sila sa mga rekord sa PSA.
Busa, matod niya nga ilang mapakita nga kini mga peke ug hinimo-himo nga mga indibidwal, nga nagpasabot nga adunay usa ka panghitabo ug sayop nga paggamit sa mga pundo sa publiko.
Ang kampo sa bise presidente kaniadto nagpahibalo niadtong Pebrero nga andam sila nga mopasabot sa paggamit og “mga alias” para sa mga confidential funds sama sa gipangutana nga nakadawat na “Mary Grace Piattos,” nga susama sa usa ka sikat nga brand sa chichiria ug restaurant.
