Mihangyo ang Cebu City Council nga i-refund ang sunod nga issueance sa bill sa Metro Cebu Water District (MCWD) kadtong mga minimum fixed charges nga nabayran sa mga konsumidor kabahin sa panahon nga wala nadawat ang supply sa tubig.
Kini human nga nakadawat og mga reklamo si Konsehal Harold Kendrick Go, nga adunay mga lugar sa Siyudad sa Sugbo ang nakasinati og walay agas sa tubig, usa na niini ang Barangay Busay kung diin 10 ma ka adlaw na nga nakasinati og walay suplay.
Hinungdan nga nakig-alayon usab si Go, ngadto sa buhatan sa MCWD ug nasuta nga tungod kini sa nasinating rotational brownout gumikan usab sa kakuwang sa suplay sa kuryente tungod sa pipila ka power plant nga wala na mo gana.
Agig pagsulbad, nihangyo ang opisyal ngadto sa MCWD nga kung mahimo, himuong makiangayon ang bayranan sa tubig sa mga konsumidor, gumikan kay base sa iyang nadawat nga reklamo, aduna gihapoy bayranan nga minimum charges ang mga konsumidor bisan walay suplay sa tubig.
Sigon usab niini nga matud sa Local Water Utilities Administration (LWUA) nga base sa bag-ong gi-isyu nga Memorandum Circular No. 009-25 o ang “Guidelines for Local Water Districts Regarding Water Supply Interruptions” niadtong Disyembre 2025, nakalatid nga kung ugaling makasinati og walay agas sulod sa 15 ka adlaw, ang mga konsumidor mamahimo nga dili mobayad og water fee ug franchise tax ang mga kosumidor ug wala usab ipatuman nga disconnection.
Kahinumdoman nga niadtong Enero ning tuiga, gihangyo ni Go ang MCWD pinaagi sa usa ka resolusyon nga i-review ang kasamtangang bayranan ilabi na sa mga konsumidor nga dugay nang way agas sama sa mga biktima sa Bagyong Tino.
Ugaling mosugot ang MCWD sa hangyo ni Go, buot niini nga ipaagi kini sa refund.
