Gipanglantawan sa House prosecution panel ang kanhi Department of Education (DepEd) Assistant Secretary ug spokesperson nga si Atty. Michael Poa isip usa ka hostile witness sa impeachment trial ni Bise Presidente Sara Duterte.
Sumala sa House trial spokesperson nga si Rep. Zia Alonto Adiong, si Poa usa ka importanteng witness sa isyu sa confidential funds sa DepEd sa dihang si Duterte ang kalihim.
Gikataho nga si Poa usa sa mga opisyal nga mitubag sa Audit Observation Memoranda (AOM) sa Commission on Audit (COA) bahin sa paggamit sa confidential funds sa DepEd.
Matud ni Adiong nga ang testimonya ni Poa makatabang sa pagpasabot kon giunsa pagdumala sa DepEd ang mga audit findings ug mga dokumento nga may kalabotan sa mga pundo.
Gikumpara ni Adiong si Poa kang OVP Assistant Secretary Lemuel Ortonio, kinsa kaniadto gipresentar sa prosekusyon isip usa ka hostile witness.
Bisan pa, siya miingon nga ang impeachment court gihapon ang adunay katapusang awtoridad sa pagdesisyon kung si Poa kwalipikado ba isip usa ka hostile witness.
Ang isyu sa confidential funds sa DepEd kabahin sa Article I sa impeachment complaint, nga naghisgot sa giingong sayop nga paggamit, pagpangawat, ug dili regular nga likidasyon sa confidential funds sa OVP ug DepEd.
