Gibutyag ni Rasel Joy Espinosa Bista, ang Communication Officer sa Filipino Community sa Nepal, nga buhi ang gikatahong Filipino OFW nga nawagtang atol sa nahitabong halapad nga mudslide sa Nepal niadtong Miyerkules, Agusto 26, 2026.
Matud niini nga buhi ang giingong nawagtang nga Filipino OFW, gumikan kay aduna silay kaubanan sa Filipino Community sa Nepal ang naka-contanct na sa mismong indibidwal, ug giklaro nga dili kini traveler lang apan, nagtrabaho gayud sa lugar.
Sigon ni Bista, nahitabo ang mudslide gumikan kay adunay nahitabong 4.4 magnitude nga linog. hinungdan nga na trigger ang pipila ka bahin niini nga maoy hinungdan sa pagkabanlas sa lugar ug pagkalubong sa mga nagkadaiyang imprastraktura.
Dugang pa sa Bombo International News Correspondent, nga human sa trahedya, dali nga mipahatud ang Nepali Government og mga hinabang sama sa mga pagkaon, tubig og first aid ngadto sa mga apektadong residente sa Kathmandu, apan nahimong hagit niini ang kalapok og walay igong tugpahanan sa lugar.
Sa pikas bahin nahinabi usab sa Bombo Radyo Cebu, si Diana Tamang, Bombo International News Correspondent nga nagpuyo sa Nepal, iyang gibutyag nga sa 15 ka tuig niining pagpuyo sa nahisgutang nasud, kini ang labing-unang higayon nga adunay halapad nga mudslide ang nahitabo sa lugar.
Matud ni Tamang, nga dakong hagit gayud ang paghatag og hinabang sa lugar lakip na ang paghakot sa mga biktima gumikan kay naguba ang 4 ka taytayan nga nagkonektar sa mga kasigbit nga lugar.
Gikabalaka usab niini ang nahitabo kay anaa didto nagpuyo ang kabanay sa iyang asawa, hinungdan nga padayon usab niyang gikontak ang pamilya niini.
Dugang pa ni Tamang, nga daghan nga mga turista ang mobisita sa lugar hilabi na sa Nepal-China boarder hinungdan nga kini ang possible sa mga rason nganung daghan usab ang na-missing nga turista.
