Nasuta sa pasiunang imbestigasyon nga ang 9mm pistol nga gigamit sa suspek sa pagpamusil sa Banga National High School sa South Cotabato nakuha gikan sa vault sa iyang amahan, kinsa usa ka empleyado sa DepEd Region 12 ug nagtudlo usab og gun safety.
Ang amahan sa 16-anyos nga estudyante sa Grade 9 nga gidudahang namusil sa maong tunghaan niadtong miaging adlaw, Setyembre 18 giila nga empleyado sa Department of Education ug nagtudlo bahin sa kaluwasan sa General Santos City.
Sa usa ka pakighinabi sa Bombo Radyo Koronadal, gibutyag ni Banga Mayor Albert Palencia nga ang amahan sa estudyante ang tag-iya sa armas nga gigamit sa pagpamusil, diin miresulta kini sa pagkamatay sa suspek ug pagkaangol sa uban.
Matod sa mayor, gitagoan sa amahan ang iyang armas sulod sa vault, apan tinuyo kining giguba sa suspek aron makuha ug madala sa eskwelahan.
Gibutyag usab sa mayor nga base sa impormasyon gikan sa adviser sa estudyante, nagplano ang inahan nga ipasailalom sa psychiatric examination ang iyang anak tungod sa nasangpit nga kinaiya niini.
Giingon sa mayor nga usa sa mga motibo nga gitan-aw sa eskwelahan mao ang giingong kabalaka sa suspek sa iyang mga grado.
Kahinumduman, nga sa wala pa kini nga insidente, aduna nay pipila ka susamang kaso sa kapintasan nga natala sa mga tunghaan sa nasod, sama sa San Jose National High School sa Tacloban niadtong Hunyo 22 ug sa Ateneo de Zamboanga University sa Zamboanga City niadtong Agosto 18.
