Miabot sa bag-ong record high nga 107,677 karong tuiga ang gidaghanon sa mga tawo nga nag-edad og 100 pataas sa Japan, sumala sa Ministry of Health, Labour and Welfare.
Kini nagtimaan sa ika-56 nga sunod-sunod nga tuig sa pagsaka sa gidaghanon sa mga centenarian sa nasud, diin ang mga babaye naglangkob sa hapit 88 porsyento sa kinatibuk-ang ihap.
Gipasigarbo sa gobyerno ang taas nga kinabuhi sa mga lumulupyo niini, nga gipasangil sa abanteng pag-atiman sa panglawas, masustansya nga pagkaon, ug aktibong estilo sa kinabuhi.
Apan, nagpadayon nga misamot ang krisis sa demograpiya sa Japan tungod sa paspas nga pagkatigulang sa populasyon inubanan sa pag-ubos sa birth rate ngadto sa pinakaubos nga lebel sa kasaysayan.
Sa pagkakaron, hapit tulo sa matag napulo ka residente sa Japan ang nag-edad og 65 pataas, usa ka ihap nga gilaumang moabot sa 40 porsyento pag-abot sa tuig 2070.
Naghatag kini og dakong hagit sa ekonomiya tungod sa kakulang sa mga trabahante nga makapundo sa mga pensyon, pag-atiman sa panglawas, ug mga serbisyong sosyal alang sa mga tigulang.
Bisan pa nga nagpatuman ang gobyerno og mga insentibo ug pinansyal nga tabang alang sa mga pamilya, ang nagkagamay nga populasyon sa nasud nagpabilin nga hulga sa pundasyon sa ekonomiya sa Japan.
