Nanawagan si President Ferdinand Marcos Jr. og mas hugot nga mga lakang aron masiguro ang kaluwasan sa mga estudyante ug magtutudlo sa mga tunghaan sa tibuok nasud.
Kini ang giluwatang direktiba sa Presidente human sa sunod-sunod nga trahedya, lakip na ang pinakabag-ong insidente sa pagpamusil sa Banga National High School sa South Cotabato.
Gihatagan og gibug-aton sa Pangulo nga ang kapintasan sulod sa eskwelahan dili gyud angay mahimong normal nga bahin sa kinabuhi sa mga batang Pilipino.
Tungod niini, nagmando si Presidente Marcos og lalom ug dinaliang imbestigasyon kung giunsa pagkuha ug pagdala sa usa ka menor de edad ang armas sulod sa kampus.
Matod sa Malacañang, kini ang ikatulo nga sunod-sunod nga insidente sa pagpamusil sa eskwelahan nga miresulta sa kamatayon sulod lamang sa milabay nga tulo ka bulan, human sa mga naunang trahedya sa Tacloban ug Zamboanga.
Tungod niini, gimandoan sa Pangulo ang Department of Education (DepEd), Department of the Interior and Local Government (DILG), ug ang Philippine National Police (PNP) nga magsumite og pormal nga taho bahin sa mga lakang ug hunit nga seguridad nga gipatuman human sa naunang mga hitabo.
