Giduso ni Senador Win Gatchalian ang pagpasar sa Comprehensive School Safety Act (Senate Bill No. 2426) human sa mga insidente sa kapintasan sa mga eskwelahan, lakip na ang bag-o lang nga pagpamusil sa Banga National High School sa South Cotabato.
Tumong sa maong lakang ang pagmugna og National Comprehensive School Safety Framework nga magsilbing giya sa mga tunghaan sa pagpugong, pagtubag, ug pagbangon gikan sa nagkalain-laing mga hulga ug insidente nga mahimong makaapekto sa kaluwasan sa mga estudyante ug kawani.
Ubos sa maong sugyot, ang Department of Education (DepEd)—inabagan sa ubang ahensya sa gobyerno ug mga lokal nga unit sa gobyerno—maoy manguna sa pagmugna, pagpatuman, ug regular nga pag-update sa maong framework.
Magtakda kini og mga sumbanan ug pamaagi alang sa pagpangandam sa kalamidad ug emerhensya, pagpugong sa kapintasan ug uban pang mga peligro, pagtubag sa mga insidente, ug mga lakang alang sa rehabilitasyon ug pagbalik sa normal nga operasyon sa eskwelahan.
Naglakip usab ang sugyot sa pagmugna og School Safety Plan, nga kinahanglang andamon ug i-update matag tuig sa matag eskwelahan.
Ang plano ipahaom sa espesipikong sitwasyon ug mga risgo nga giatubang sa matag eskwelahan ug komunidad, aron masiguro nga dili ipatuman ang usa ka pamaagi nga parehas para sa tanan (one-size-fits-all) sa tanang lokasyon.
Gikinahanglan usab ang mga eskwelahan nga mag-andam ug kanunay nga mag-update sa School Safety Handbook nga adunay sulod nga mga importanteng polisiya, pamaagi, impormasyon sa emerhensya, ug mga serbisyo nga magamit sa mga estudyante. Maglakip usab kini og School Code of Conduct nga tin-aw nga naghubit sa mga gidili o dili madawat nga pamatasan, ingon man ang katugbang nga mga lakang sa disiplina ug mga interbensyon alang sa pagtul-id o restorative interventions.
Matod ni Gatchalian, ang mga eskwelahan dili angay nga magtutok lamang sa pagtubag human mahitabo ang usa ka insidente. Kinahanglan usab nga adunay tin-aw nga sistema aron mailhan ug mapugngan ang mga posibleng hulga sa dili pa kini mosamot ug mahimong kapintasan.
“Dili paigo ang pagtubag lamang human mahitabo ang problema. Kinahanglan kitang mahimong proactive—ilhon ang mga hulga, pugngan ang mga insidente sa dili pa kini mahitabo, ug sigurohon nga luwas ang matag eskwelahan,” matod ni Gatchalian.
Pinaagi sa usa ka nasudnong gambalay, tumong sa sugyot ang pagtukod og mas parehas nga mga sumbanan alang sa kaluwasan sa eskwelahan samtang gihatagan og gahom ang matag eskwelahan nga ipahaom ang mga lakang base sa espesipikong sitwasyon ug mga risgo sa komunidad niini.
