Giduso ni Senador JV Ejercito ang pagdoble sa binuwan nga social pension alang sa mga kabus nga senior citizen gikan sa P1,000 ngadto sa P2,000 aron makatabang sa pagbayad sa mga galastohan sa pagkaon, tambal, pag-atiman sa panglawas, ug uban pang batakang panginahanglan.
Pinaagi sa Senate Bill No. 2522, gisugyot ni Ejercito ang pag-amyenda sa Republic Act No. 11916, nga sa pagkakaron nagtakda sa binuwan nga social pension alang sa mga kwalipikadong indigent senior citizens sa kantidad nga P1,000.
Matod ni Ejercito, ang kasamtangang kantidad dili na igo tungod sa padayon nga pagsaka sa presyo sa pagkaon, mga maintenance nga tambal, serbisyong medikal, bayranan sa utilities, ug transportasyon.
Tumong usab sa sugyot nga palapdan ang depinisyon sa indigent senior citizens aron maapil niini ang mga walay pension o walay permanente nga tinubdan sa kita, ingon man ang mga nakadawat og pension, kompensasyon, o pinansyal nga tabang nga dili molapas sa P10,000 matag bulan.
Diin ang Department of Social Welfare and Development (DSWD) ang magdeterminar sa kwalipikasyon ubos sa gisugyot nga balaodnon.
Nagtinguha usab ang balaodnon nga tangtangon ang kasamtangang rekisitos nga ang usa ka kabus nga senior citizen kinahanglan nga “luya, masakiton, o adunay disability” aron maka-qualify sa social pension.
Gisugyot usab ni Ejercito nga mandaran ang DSWD—ubos sa pag-apruba sa Department of Budget and Management (DBM) ug pakig-alayon sa mga hingtungdan nga sektor—nga repasohon ang kantidad sa social pension matag duha ka tuig ug ipatuman ang mga pag-adjust kung gikinahanglan.
