Gilubong sa usa ka mass funeral ang mga patayng lawas sa 75 ka Palestino nga bag-ohay lamang nakit-an ilalom sa mga nagun-ob nga balay ug building sa Gaza, sumala sa Ministry of Health sa Palestine.
Gatusan ka Palestino ang mitambong sa prosesyon sa paglubong sa mga biktima sa Sheikh Radwan Cemetery ug kadaghanan sa mga biktima gikan sa Daraj neighborhood sa amihanan-sidlakang bahin sa Gaza City, diin daghan kanila ang mga babaye ug kabatan-onan nga anaa sa sulod sa ilang mga balay sa dihang giatake kini.
Matod sa direktor sa public relations sa Gaza Civil Defence nga si Abdullah al-Majdalawi, narekober ang mga patayng lawas sa miaging mga semana gikan sa pipila ka balay nga giguba atol sa unang mga bulan sa gubat.
Gipanag-iya sa mga 20 ka pamilyang Palestino ang mga biktima, lakip na ang mga tawo nga nangitag dangpanan sa maong mga balay.
Sumala sa Civil Defence, gituohang anaa pa ilalom sa mga kagun-oban sa tibuok Gaza ang patayng lawas sa laing 8,000 ka Palestino.
Samtang, mikabat na sa labing menos 74,475 ka Palestino ang namatay sukad gisugdan sa Israel ang gubat sa Gaza niadtong Oktubre 2023.
