Giakusahan ni Bise Presidente Sara Duterte ang administrasyong Marcos nga naggamit sa mga alegasyon batok kaniya, nga naglambigit sa mga negosyo nga gipondohan sa China, drug bust sa Laos, ug usa ka giingong “travel authority” sa biyahe ngadto sa Laos, aron paningkamotan nga mapalagpot siya sa katungdanan.
Sa usa ka opisyal nga gipagawas sa Opisina sa Bise Presidente, ang iyang sentimento nga ang gobyerno naglambigit kaniya sa mga bag-ong isyu aron ipakita siya isip usa ka hulga sa nasudnong seguridad, human napakyas ang prosecution team sa House of Representatives sa pagpamatuod sa mga akusasyon batok kaniya.
“Now, we are witnessing an apparent shift in the government’s narrative in taking me down, attempting to reframe the matter as a national security issue. Every thread seems to be stretched into a conspiracy—from a business venture allegedly linked to Chinese funding to a drug bust in Laos supposedly connected to a Mindanao-Davao conspiracy,” matod ni Duterte sa iyang pahayag.
Gikuwestiyon sa Bise Presidente ang mga ebidensya luyo niining mga akusasyon, ug nagkanayon nga sa katapusan, mapakyas ra gihapon kini sa pagpamatuod sa bisan unsa.
Samtang, gipanghimakak ni Duterte ang giingong “travel authority” alang sa biyahe ngadto sa Laos, nga iyang gitawag nga “hinimo-himo,” human mikatap ang usa ka dokumento nga nagpasabot nga mibiyahe siya sa nasud. Gihulagway niya ang mga pagsulay sa paglambigit kaniya sa operasyon batok sa droga sa Laos isip usa ka buhat nga nagpakita og desperasyon.
“What we see instead is desperation, exemplified by a purported travel authority for Laos that appears to have been fabricated to prop up a narrative unsupported by credible evidence,” matod ni Duterte.
Dugang pa niya, ang Malacañang mismo ang naglimod sa maong “travel authority” alang sa Laos, ug nagpamatuod nga kini walay kamatuoran. Bag-o lang usab giklaro sa Department of the Interior and Local Government (DILG) nga ang pamilyang Duterte walay kalambigitan sa nahisgutang operasyon batok sa droga sa Laos.
“Government should start working and stop politicking. The people are impoverished, hungry, and angry,” pa ni Duterte.
