MANDAUE CITY,CEBU- Gibanabana nga 110 ka panimalay ang naapektuhan sa dakong sunog sa Barangay Labogon, Mandaue City, Cebu, Martes sa hapon, Oktubre 20, 2026.
Sa pakighinabi sa Bombo News Team, gipadayag ni Dr. Mike Pialago, head sa Mandaue City Welfare Services, nga nag-andam ang siyudad sa paghatag og pinansyal ug pagkaong tabang sa mga pamilyang naapektuhan sa sunog.
Una nang giila sa City Social Welfare and Development Office ang 98 ka pamilya nga posibleng naapektuhan sa insidente.
Matod ni Pialago, mopahigayon ang buhatan og validation karong hapon aron makumpirma ang mga lehitimong benepisyaryo ug mailhan kon kinsa ang mga tag-iya sa balay, mga nangabang, ug ubang pamilyang naapektuhan.
Ubos sa programa sa tabang sa siyudad, makadawat og ₱10,000 ang matag tag-iya sa balay nga naapektuhan sa sunog, samtang ₱5,000 ang igahin alang sa matag nangabang.
Gipalugway usab ngadto sa lima ka adlaw ang paghatag og pagkaon sa mga apektadong pamilya, gikan sa orihinal nga tulo ka adlaw, human giaprobahan sa mayor ang hangyo sa barangay.
Base sa report sa BFP, mikabat sa 3,000 square meters ang naapektuhan sa sunog, nga gibanabanang miresulta sa ₱1.5 milyong kadaot.
Nadawat ang report alas 5:18 sa hapon ug miabot ang mga bombero pito ka minuto human niini. Misaka sa ikaduhang alarma ang sunog alas 5:42 ug sa ikatulo alas 5:47.
Gideklarar kini nga Fire Under Control alas 7:12 sa gabii ug Fire Out alas 8:43.
Padayon pang giimbestigahan ang hinungdan sa sunog ug kon aduna bay namatay o naangol.
