Nagpakatap na ang Police Regional Office 7 og kapin sa 2,300 ka pulis isip kabahin sa dul-an 4,000 ka security personnel nga giandam aron masiguro ang kalinaw ug kaluwasan sa ASEAN Defense Ministers’ Meeting (ADMM) 2026, diin ang seremonyas sa deployment gihimo sa Mactan Shrine, Lapu-Lapu City.
Ang mga kalihokan sa ASEAN ipahigayon gikan sa Oktubre 26 hangtod 30, samtang magpadayon ang deployment sa mga security personnel hangtod sa unang semana sa Nobyembre. Tumong niini nga mapanalipdan ang mga delegado ug publiko, lakip na ang pagmintinar sa kalinaw sa panahon sa pagsaulog sa Kalag-Kalag 2026.
Matod ni PRO7 Regional Director PBGen Arnold Abad, ang seguridad maglangkob sa mga agianan, kapuy-an sa mga delegado ug mga venue sa kalihokan.
Makigtambayayong usab ang kapulisan, militar, bombero, Philippine Coast Guard ug mga lokal nga panggamhanan aron malikayan ang posibleng hulga ug dali nga matubag ang mga emerhensiya.
Ingon man nga mipasalig ang PRO7 nga magpadayon sa paghatag og seguridad aron masiguro ang malinawon nga pagpahigayon sa ASEAN ADMM 2026 ug ang kaluwasan sa publiko panahon sa Kalag-Kalag 2026.
Una usab niini, gipaambit ni PLTCOL Rolan Aliser, ang tigpamaba sa PRO-7 nga magsugod ang opisyal nga deployment karong Lunes, Oktubre 26, ug magpadayon hangtod sa Nobyembre 1, tungod sa mga kalihokan nga matapos sa katapusan sa Oktubre ug sa post-deployment operations.
Gipaambit usab niini nga andam na ang kapolisan sa PRO-7 sa tibuok rehiyon sa Central Visayas alang sa pagsaulog ug pagseguro sa kasegurohan atol sa Kalag-kalag 2026.
Diin nakapahigayon na sila og mga security briefings ug mga tigum alang sa pag-alokar ug pag-deploy sa ilang mga personnel. Gipadayag ni Aliser nga aduna silay 3,255 ka deployable personnel sa tibuok rehiyon nga ipakatap aron magbantay ug mag-man sa tanang mga sementeryo. via Bombo Rexmond Omega
