Nakita sa House Prosecution Panel ang plano sa kampo sa depensa nga modangop sa Korte Suprema isip posibleng bag-ong taktika aron malangan ang impeachment trial batok kang Bise Presidente Sara Duterte.
Kini nga pahayag migawas human nagpahayag ang tigpamaba sa depensa nga si Atty. Michael Poa nga andam silang modala sa isyu mahitungod sa gidaghanon sa mga boto nga gikinahanglan aron mapahamtangan og silot ang Bise Presidente sa impeachment trial sa Senado ngadto sa Korte Suprema.
Kahinumdoman nga niadtong Setyembre 23, ang Senate Impeachment Court miboto aron ipaubos ang gikinahanglang gidaghanon sa boto alang sa mga proseso sa impeachment; 13 ka senador ang miboto pabor niini, samtang si Presiding Officer Chiz Escudero lamang ang miboto batok niini.
Matod ni Rep. Zia Alonto Adiong, ang tigpamaba sa House Prosecution Panel, nakapagawas na og desisyon ang Korte Suprema bahin niining maong isyu, ug niadtong Setyembre 30, gisalikway sa Korte ang managlahing mga petisyon nga gisang-at nila ni Atty. Victor Rodriguez, Atty. Ernesto Francisco Jr., ug Berteni Cataluña Causing, tungod sa kakuwang sa “legal standing” ug tungod kay wala pa kini panahon nga isang-at (premature).
Gipasiugda ni Adiong nga bisan pa man og katungod sa kampo sa depensa ang pagdangop sa Korte Suprema, lagmit magpabilin ra gihapon ang desisyon sa Korte, sanglit ang hisgutanan ug ang mga legal nga argumento nga gipresentar susama ra sa anaa sa mga petisyon nga gisalikway na kaniadto.
