Miabot sa rekord nga US$64 bilyon ang export sa Pilipinas sa unang walo ka bulan sa 2026, gumikan sa pagtubo sa electronics ug semiconductors industry.
Tungod niini, gipalig-on sa gobyerno ang paningkamot sa pagdani og dagkong pamuhunan sa chip design, engineering ug research.
Matod ni Executive Secretary Ralph Recto, pangulo sa Semiconductor and Electronics Industry Advisory Council (SEIAC), nagkadako ang papel sa Pilipinas sa global nga kadena sa suplay sa teknolohiya, gikan sa asembliya ngadto sa mas abanteng mga kalihokan.
Base sa datos sa Philippine Statistics Authority (PSA), miabot sa US$9.1 bilyon ang eksport sa Agosto, diin US$6.2 bilyon o 68 porsyento niini gikan sa electronics.
Gipataas usab sa Semiconductor and Electronics Industries in the Philippines Foundation, Inc. (SEIPI) ngadto sa 10 porsyento ang banabana sa pagtubo sa eksport sa electronics karong 2026, tungod sa panginahanglan sa AI ug mga data center.
Samtang, gilauman nga palapdan sa Toshiba ang operasyon niini sa Pilipinas sulod sa tulo ka tuig, nga posibleng makamugna og 3,000 ka trabaho.
Tumong sa industriya nga maabot ang US$110 bilyon nga tinuig nga eksport sa 2030, uban sa pagpalapad sa produksyon sa semiconductor ug electronics.
Gilauman usab nga ang Luzon Economic Corridor ug mga planong technology hub makatabang sa pagdani og dugang pamuhunan ug pagmugna og trabaho alang sa mga Pilipino.
