Andam na ang mga bus terminal sa Sugbo alang sa gipaabot nga pagdagsa sa mga pasahero sa umaabot nga Kalag-Kalag, diin daghang mga Sugboanon ang mobiyahe paingon sa ilang mga probinsya aron sa pagbisita sa ilang mga namatay nga minahal sa kinabuhi.
Lakip sa mga lakang nga giandam sa Cebu South ug North Bus Terminals ang pagdugang sa mga pasilidad, pagpalig-on sa seguridad, ug pagpatuman sa bag-ong sistema sa pagsakay aron mas hapsay ug komportable ang paghulat ug pagbiyahe sa mga pasahero.
Kini ang gipaambit ni Ahmed G. Cuizon, ang head sa Cebu South ug North Bus Terminals sa lalawigan sa Sugbo, diin gawas sa 5 ka bag-ong air-conditioned units nga anaa na sa terminal, magamit usab sa mga pasahero ang libreng Wi-Fi, pagtawag pinaagi sa free calls, ug mga charging station.
Dugang pa ni Cuizon, mag-operate ang mga terminal sulod sa 24 ka oras, diin adunay mga personnel nga gi-assign sa overtime duty aron masiguro ang padayong operasyon ug pag-atiman sa mga biyahero.
Kauban sa mga magbantay ang mga blue guard, kapulisan, security guards, ug mga personnel sa Philippine Drug Enforcement Agency.
Gipasabot usab ni Cuizon ang bag-ong lakang nga ipatuman sa terminal mao ang pagbag-o sa sistema sa boarding o pagsakay sa mga pasahero, diin gituyo ang maong kausaban aron malikayan ang panaglalis ug ang pagsingit sa linya, nga nahitabo ubos sa kanhing boarding system.
Sa pagkakaron, ipatuman una ang maong sistema sa South Bus Terminal, ug kon hingpit na kining maimplementar, giplanohan usab nga ipatuman kini sa North Bus Terminal.
Gikonsiderar usab sa terminal management ang kalainan sa kahimtang sa duha ka terminal. Diin ang South Bus Terminal adunay siradong pasilidad nga adunay air-conditioning, samtang mas limitado ang luna sa North Bus Terminal ug wala kini air-conditioning, hinungdan nga mas lisod ang paglihok sa mga pasahero.
Tungod niini, dugangan usab ang mga electric fan sa duha ka terminal aron mas komportable ang mga biyahero samtang naghulat sa ilang mga sakyanan. via Bombo Jemm Mayot
