Gisaway ni US President Donald Trump ang bag-ong nahuman nga eleksyon sa Brazil ug nagpasangil nga adunay nahitabong kaylap nga pagpanglimbong nga maoy hinungdan sa kadaugan ni President Luiz Inácio Lula da Silva.
Ang maong pamahayag gihimo sa lider sa Estados Unidos human napildi ang iyang gisuportahan nga kandidato ug anak sa kanhi president nga si Flávio Bolsonaro.
Subay sa opisyal nga tally, nakakuha si Lula og 51.8 porsyento sa kinatibuk-ang mga boto, samtang nakatala lamang og 48.2 porsyento ang 45-anyos nga si Senador Bolsonaro.
Nagpahayag og dakong katingala si Trump sa nahimong resulta ug miinsistir nga adunay “klaro ug kaylap nga pagpanglimbong” sa maong nga botasyon.
Gitan-aw sa mga analista nga kon nakadaog pa ang batan-ong Bolsonaro, aduna untay mas dakong papel ang mga konserbatibong lider sa Latin America nga nagtinguha sa pakig-alyansa ug pagkuha og suporta gikan sa administrasyon sa Estados Unidos.
Samtang sa pikas bahin, ang pilderong kandidato nga si Senador Flávio Bolsonaro nag-atubang usab karon og mga imbestigasyon sa Brazil bahin sa giingong korapsyon ug money laundering nga may kalabotan sa pagpondo sa usa ka pelikula bahin sa kinabuhi sa iyang amahan nga si Jair Bolsonaro.
