Mipasaka og “Motion for Reconsideration” ang kanhi Mayor sa Siyudad sa Sugbo nga si Raymond Alvin Garcia aron hagiton ang mga nakaplagan sa Office of the Ombudsman kalabot sa usa ka administratibong kaso, nga naglambigit sa usa ka Letter of No Objection (LONO) nga iyang giisyu alang sa usa ka gisugyot nga kalihokan sa sabong sa tuig 2024.
Sa pagpakighinabi sa Bombo Radyo Cebu kaniya, gipadayag ni Garcia nga iyang gitahod ang desisyon sa Ombudsman apan wala siya mouyon sa mga nakaplagan niini ug nangatarungan siya nga adunay pipila ka mga kamatuoran ug legal nga mga isyu nga angay pang susihon pag-usab.
Ang kaso nagtuyok sa usa ka LONO nga giisyu ni Garcia niadtong Abril 23, 2024, isip tubag sa usa ka hangyo nga ipahigayon ang duha ka adlaw nga “Seven Cock Derby” sa Fili NUSTAR and Casino Convention Center naidtong Mayo 23 ug 24, 2024.
Gihimug-atan ni Garcia nga ang maong sulat dili usa ka pinal nga espesyal nga permiso nga nagtugot sa maong kalihokan ug tataw nga gipailalom pa sa kasamtangang mga balaod, regulasyon, ug mga kondisyon, ug ang gikinahanglan nga proseso sa pagkuha og permiso wala pa mahuman.
Sumala kang Garcia, ang mga aplikasyon wala makakompleto sa gikinahanglan nga proseso, wala makaabot sa iyang buhatan alang sa pinal nga pag-aprubar, ug wala miresulta sa pag-isyu niini og pinal nga espesyal nga pagtugot.
Sigon niini, nga ang pagtubag sa usa ka pormal nga hangyo pinaagi sa usa ka sulat nga adunay mga kondisyon dili angay isipon nga awtomatikong pinal nga pagtugot.
Matod ni Garcia, ang desisyon sa Ombudsman naglatid og multa isip puli sa suspensyon tungod kay wala na siya naghupot og posisyon sa gobyerno, apan ipadayon niya ang paggamit sa mga legal nga paagi pinaagi sa iyang gisang-at nga “motion for reconsideration”.
Gipunting usab niya nga ang desisyon wala naglakip sa dugang nga silot nga permanenteng pagdili sa paghupot og posisyon sa gobyerno. Naglaum siya nga aduna pa siyay laing higayon nga makaserbisyo sa umaabot.
