Giawhag ni President Ferdinand Marcos Jr. ang publiko nga dili mag-panic taliwala sa pag-usos sa bili sa peso, diin miabot ang exchange rate niini sa kapin P64 batok sa US dollar.
Niadtong Miyerkules, Oktubre 28, miusos ang peso ngadto sa P64.08 atol sa trading nianang adlawa.
Matod ni Marcos, ang gobyerno aktibong naghimo og mga lakang aron mapugngan ang padayon nga pagkahuyang sa lokal nga salapi.
Gipahayag sa Pangulo nga adunay igong kapasidad ang gobyerno aron suportahan ang peso.
Gipasabot niya nga ang pagkahuyang sa salapi gumikan sa pagsaka sa presyo sa lana sa tibuok kalibotan ug sa pagkusog sa US dollar.
Tungod niini, ang mga imported nga produkto—lakip na ang lana ug pipila ka batakang palaliton—posibleng mahimong mas mahal, nga mahimo usab nga makaapekto sa pletihan sa transportasyon ug uban pang batakang galastohan sa publiko.
Samtang, gipunting ni Marcos nga ang gobyerno nangita usab og mga paagi aron mapaubos ang presyo sa mga pagkaon.
