Nagpasidaan ang Philippine National Police-Anti-Cybercrime Group (PNP-ACG) sa publiko batok sa nagkalainlaing matang sa mga online scam, ilabi na nga gilaumang modaghan ang mga transaksyon sa internet karong panahon sa kapaskohan.
Matod sa tigpamaba sa PNP-ACG nga si Police Lieutenant Colonel Zyrah Joy Cabal, kasagarang gigamit sa mga scammer ang mga peke nga promosyon, pag-angkon nga nakadaog og premyo, ug mga scam nga may kalabotan sa delivery aron ilaron ang mga tawo.
Nagtambag siya sa publiko nga dili basta-basta mo-click sa mga link nga ipadala pinaagi sa text message, ug sigurohon una kon lehitimo ba ang mga website o account sa dili pa magpadala og kwarta.
Giawhag usab ang mga biktima nga ireport dayon ang insidente ngadto sa Anti-Cybercrime Group ug maghatag og mga ebidensya, sama sa mga screenshot sa panag-istoryahanay, resibo sa bayad, mga ngalan sa account, numero sa telepono, ug ang mga link sa profile sa scammer.
Gipasiugda ni Cabal nga dili angay maulaw ang mga tawo sa pagpasaka og reklamo, tungod kay makatabang kini sa pagpanalipod sa ilang pinagkuhian ug pinagkugi nga kwarta karong panahon sa Pasko.
