Nag-apod-apod ang Department of Social Welfare and Development (DSWD) og mga kahon sa pagkaong andam nang kan-on ug mga suplay sa tubig Biyernes sa hapon, Oktubre 30, human sa kasarangang pagbuto sa Bulkang Mayon sayo sa buntag.
Matod sa ahensya, nag-andam kini og 417,886 ka family food packs (FFPs), 14,137 ka kahon sa pagkaong andam nang kan-on (ready-to-eat food o RTEF), ug 28,366 ka pakete sa mga gamit nga dili pagkaon (non-food items o NFIs) diha-diha human sa pagbuto.
Nahimo kini human gimandoan sa mga lokal nga panggamhanan sa Camalig, Malilipot, ug Tabaco City sa Albay ang mandatory nga pagbakwit sa mga pamilyang nagpuyo sulod sa unom ka kilometrong Permanent Danger Zone (PDZ).
Misunod usab kini sa pagpataas sa alert level sa bulkan ngadto sa Alert Level 3.
Dugang pa, gimandoan sa ahensya ang ilang SWAD Team ug Disaster Response Management Division nga ipahigayon ang profiling sa mga pamilyang namakwit tungod sa kalihokan sa bulkan.
Gisuspinde usab ang klase sa mga apektadong lugar.
