LAPU-LAPU CITY,CEBU- Namatay ang usa ka 38-anyos nga lalaki samtang duha pa ka indibidwal ang naangol human gilamoy sa kalayo ang duha ka panimalay sa Purok Rosal, Barangay Looc, Lapu-Lapu City, kagabii, Nobyembre 1, atol sa pagsaulog sa Adlaw sa mga Santos.
Nagpahayag og pakig-ambit sa kasubo si Lapu-Lapu City Mayor Cindi Chan ngadto sa pamilya sa namatay.
Gipasalamatan usab niya ang paspas nga pagresponde sa mga bombero nga nakapugong sa mas dakong pagkaylap sa kalayo.
Matod ni Chan, ikaduhang insidente na sa sunog nga natala sa siyudad nianang adlawa ang nahitabo sa Barangay Looc, human sa naunang sunog sa Barangay Canjulao.
Sa unang insidente sa Purok Saging, Barangay Canjulao, mikabat sa 29 ka pamilya o 89 ka indibidwal ang naapektuhan, samtang 21 ka panimalay ang nangaugdaw sa sunog.
Gipasaligan ni Chan nga hatagan og ayuda sa lokal nga panggamhanan ang mga pamilyang naapektuhan sa sunog sa Looc.
Lakip niini ang pagkaon sulod sa tulo ka adlaw ug rental subsidy aron makabalhin sila sa temporaryong kapuy-an samtang giproseso ang cash assistance alang sa pagtukod pag-usab sa ilang mga balay.
