Gisalikway sa International Criminal Court (ICC) Trial Chamber III ang mga hangyo sa mga abogado sa biktima sa crimes against humanity nga kaso batok kang kanhi Presidente Rodrigo Duterte nga gamiton ang Tagalog sa pipila ka bahin sa ilang opening statement.
Kini usa sa mga desisyon nga gihimo sa trial chamber atol sa ikalima nga pre-trial conference sa ICC sa The Hague. Diin wala mitambong si Duterte sa maong miting human gitugotan sa korte ang hangyo sa depensa nga dili na siya kinahanglan pang motambong.
Matod ni Presiding Judge Joanna Korner, ang pagtugot sa paggamit sa Tagalog nga dili usa sa mga opisyal nga pinulongan sa ICC, makapalisod sa proseso sa mga aplikasyon sa mga biktima ug makapataas pag-ayo sa gasto sa pagdungog tungod sa panginahanglan alang sa translation.
Ang maong hangyo gipadayag ni Massidda, kinsa nangatarungan nga gikinahanglan ang paggamit sa Tagalog aron tukma nga mapadayag ang mga asoy sa mga biktima.
Gipasabot ni Massidda nga ang paggamit sa Tagalog limitado lamang sa pagkutlo sa mga pulong sa mga biktima, ug dili kini gamiton sa tibuok opening statement.
Matod ni Massidda, gibanabana nga ang paggamit sa Tagalog sa ilang pasiunang pahayag molungtad lamang og 15 ngadto sa 20 ka minuto.
Ubos sa Rome Statute, ang opisyal nga mga pinulongan sa ICC mao ang English ug French.
Samtang, atol sa status conference, ang abogado sa depensa ni Duterte nga si Peter Haynes nagpahayag nga nagplano usab siya nga mohatag og pahayag sa pagsugod sa kaso.
