Gimandoan sa International Criminal Court (ICC) si kanhi Presidente Rodrigo Duterte nga personal nga motambong matag adlaw sa iyang husay bahin sa mga krimen batok sa katawhan o crimes against humanity, nga magsugod sa Nobyembre 30, 2026, sa The Hague, Netherlands.
Gipahibalo ni Presiding Judge Joanna Korner ang maong direktiba atol sa katapusang status conference sa kaso niadtong Lunes, Nobyembre 2.
Miuyon usab ang lead defense counsel ni Duterte nga si Peter Haynes ug mipasalig nga motambong ang iyang kliyente sa husay.
Gikumpirma usab sa ICC Prosecutor nga si Julian Nicholls nga mokabat sa 29 ka saksi gikan sa Pilipinas ang gikatakdang mosaksi pinaagi sa video conference.
Tungod sa pito ka oras nga kalainan sa oras tali sa Pilipinas ug Netherlands, gi-adjust sa korte ang iskedyul sa mga pagdungog aron dili molapas sa alas-8:00 sa gabii sa Manila ang testimonya sa mga saksi.
Gilauman nga magsugod ang husay sa alas-3:00 sa hapon, oras sa Pilipinas.
Gimandoan usab sa korte ang prosekusyon nga unahon ang mga saksi nga personal nga motambong sa korte, nga sundan sa mga mosaksi pinaagi sa video conference.
Si Duterte nag-atubang og mga kaso may kalabotan sa giingong mga pagpatay ug paglapas sa tawhanong katungod ubos sa iyang kampanya batok sa ilegal nga droga.
Sa Nobyembre 30, gikatakdang ipresentar sa prosekusyon ang ilang pangbukas nga mga argumento ug ebidensya.
