Nahatagan og dungog sa Sugbo ug sa University of San Jose-Recoletos si Roberto Toledano Jr. human niya makuha ang ikawalong pwesto sa October 2026 Certified Public Accountants Licensure Examination, diin siya ang nag-inusarang topnocher gikan sa Sugbo.
Gikan sa yano nga tumong nga makapasar lamang, wala nagdahom si Toledano nga makasulod siya sa topnotchers tungod kay giila niya nga dili kaayo niya forte ang accounting.
Giila usab ni Toledano ang pressure isip usa sa pinakadakong hagit nga iyang giatubang atol sa review season, ilabi na kay adunay mga kauban niya sa batch nga nakasulod usab sa topnotchers sa miaging March CPALE.
Nakat-onan usab niya ang kamahinungdanon sa pagbalanse sa mental ug pisikal nga kahimsog human niya maamgohan nga nasobraan siya sa pag-focus sa mental preparation atol sa integrated classes ug napasagdan ang iyang pisikal nga kahimtang.
Gidala usab ni Toledano ang mga values nga iyang nakat-onan gikan sa iyang alma mater, ilabi na ang kultura sa pagtinabangay ug pagsuporta sa usag usa nga gipakita mismo sa mga faculty ug educators sa unibersidad.
Gipasalamatan niya ang USJ-R sa padayon nga paggiya ug suporta nga iyang nadawat sa tibuok niyang academic journey hangtod sa iyang pagpangandam alang sa CPALE ug karon nga nakaangkon siya og dakong dungog isip topnotcher.
Gikuha ni Toledano ang kursong Accountancy tungod kay mao kini ang pangandoy sa iyang inahan, nga iyang gipaningkamotan nga matuman pinaagi sa pagkab-ot sa pagka-Certified Public Accountant.
Gitinguha usab niya nga moskwlela sa kursong Law isip sunod niyang lakang, nga mao usab ang kurso nga kaniadto gusto sa iyang amahan.
Gihatagan usab og pag-ila sa USJ-R ang iyang kalampusan pinaagi sa paghatag og laptop ug cash incentive nga mokabat sa 6 digits.
Gipasalamatan usab ni Toledano ang Ginoo nga nahimong giya kaniya sa tibuok niyang panaw, gikan sa pagpangandam hangtod sa pagkab-ot sa ikawalong pwesto sa nasudnong board examination.
