Giplanohan ni Cebu City Mayor Nestor Archival ang pagtukod og dagkong solar-powered evacuation center nga mahimong long-term solution sa pag-atiman sa mga residente nga maapektuhan sa mga kalamidad.
Kini subay sa unang anibersaryo sa pag-igo sa Bagyong Tino sa dakbayan sa Sugbo niadtong Nobyembre 4, 2025, nga nagbilin og dakong kadaot sa mga kabalayan ug imprastraktura, ilabina sa mga komunidad nga grabeng gibahaan.
Matud ni Archival, gitinguha nga kompleto sa mga higdaanan ug adunay kaugalingong bodega ang maong mga evacuation center diin mahimong tipigan og nagkalain-laing panginahanglanon sa mga evacuees.
Dili lamang kini basta kapuy-an sa mga residente panahon sa kalamidad, giplanohan usab nga adunay kaugalingong stand-alone generator ug solar power system aron masiguro ang suplay sa kuryente bisan pa og maputol ang linya niini tungod sa kusog nga mga bagyo.
Gitinguha usab nga adunay internet connection ang maong pasilidad aron magpadayon ang komunikasyon ug koordinasyon sa mga otoridad panahon sa emerhensya.
Samtang, gipadayag usab ni Archival nga molarga siya sa Manila karong adlawa aron sa pagkuha sa 100 million pesos nga pondo alang sa rehabilitasyon sa mga imprastraktura nga naguba tungod sa Bagyong Tino.
Gikan kini sa 362 million pesos nga gipangayo sa dakbayan alang sa pag rehabilitate sa mga naguba nga imprastraktura, diin 100 million pesos niini ang naaprubahan.
Dugang pa sa mayor, nakigtambayayong na usab ang Cebu City government sa dakbayan sa Mandaue ug munisipalidad sa Liloan alang sa pagbutang og mga sensing device nga magsubay sa lebel ug gidaghanon sa tubig nga gikan sa kabukiran ug posibleng moagos paingon sa mga komunidad sa dakbayan sa Sugbo.
Pinaagi niini, gilaoman nga makahatag og mas sayong pasidaan ngadto sa mga residente kung adunay hulga sa pagbaha, aron makapangandam ug makabalhin dayon sa mas luwas nga lugar sa dili pa mosamot ang sitwasyon.
